Замена фільтра паветра ў BMW R1250GS

Вітаю, шаноўныя чытачы!

Надышоў час штогадовага сэрвіснага абслугоўваньня майго матацыкла.

Гарантыя на матацыкл даўно скончылася, а якасьць абслугоўваньня ў афіцыяльных сэрвісах не адпавядае коштам іх паслуг, таму сёлета я вырашыў рабіць ўсё самастойна.

Ёсьць шэраг прац, якія цяжка было б зрабіць без спецыяльнага абсталяваньня, але базавы сэрвіс у гэтым матацыкле насамрэч можа зрабіць кожны, хто ўмее карыстацца дынамаметрычным ключом.

Выбар фільтра паветра

Нумар арыгінальнага фільтра паветра для BMW R1250GS - 13 72 7 726 799.

Канешне фірма BMW не вырабляе самастойна ніякія фільтры - іх вырабляюць іншыя кампаніі, якія спецыялізуюцца на гэтым і з якімі ў BMW ёсьць кантракт.

Па чутках, арыгінальныя фільтры паветра для BMW вырабляе фірма MANN.

Я вырашыў параўнаць кошт OEM фільтра і яго заменьніка ад MANN С 18 008 - 11 573 41 S01: 130зл(30€) супраць 80зл(19€).

На маю думку розьніца дастатковая, каб не пераплочваць за тры магічныя літары.

Маё асабістае меркаваньне: фільтр паветра не мусіць быць самы арыгінальны і дарагі, няхай гэта будзе якасны заменьнік, але які мяняецца рэгулярна.

Запчасткі я набыў у аднаго з афіцыйных дылераў BMW у Польшчы, які знаходзяцца ў іншым горадзе і атрымаў іх поштай.

Атрымалася танней чым купляць у лакальнага дылера. Не пытайце мяне як працуе ў іх цэнаўтварэньне, бо я ня ведаю :(

Што спатрэбіцца

Звычайны набор інструментаў для абслугоўваньня матацыкла, галоўным чынам набор насадак тыпу torx ды шрубоўка.

З незвычайных рэчаў: невялічкі магніт альбо магнітная шрубоўка, некаторыя ніты глыбока сядзяць і без магніту іх цяжка будзе дастаць.

Замена фільтра паветра

1. Здымаем сядушку кіроўцы

2. Далей трэба зьняць накрыўку паліўнага бака. Пачынаем з гэтых дзьвюх нітаў.

3. Потым пераходзім на пярэдняй часткі накрыўкі каля руля: тут два ніты збоку і адзін доўгі пасярэдзіне.

4. Наступныя два ніты знаходзяцца ўнутры схоўка

5. Пасля таго, як усе ніты выкручаныя, здымаем накрыўку, якая трымаецца на кліпсах. Я рабіў гэта пацягнуўшы яе трошкі ўверх і потым на сябе.

6. Выкручваем покрыўку фільтра паветра, якая трымаецца на чатырох нітах. Каб выцягнуць ніты карыстаемся магнітам.

7. Выцягнуць покрыўку фільтра перашкаджаюць бакавыя плястыкі. Можна адкруціць ветраахову і, у маім выпадку, гэтага было дастаткова, каб трошкі адхіліць плястыкі і выцягнуць яе.

8. Цяпер можна лёгка дастаць і сам фільтр паветра: спачатку выцягваем рамку

Стары фільтр паветра праехаў каля 10 тысяч кіламетраў у вельмі розных варунках: было шмат асфальту, але адначасна і шмат афроўду.

BMW раіць кожныя 10 тысяч км правяраць і прадзьмухіваць яго, альбо мяняць у разе патрэбы.

Гледзячы на кошт, я раю проста мяняць яго раз у год. Рухавік будзе вам удзячны за гэта.

9. Калі маеце пыласмок побач - варта вычысьціць корпус фільтра ад пылу і бруду

Бонусам можна пабачыць у якім стане знаходзяцца дросельныя заслонкі

10. Усталёўваем новы фільтр паветра на месца

11. Усталёўваем покрыўку фільтра паветра на месца і закручваем яе на чатырох нітах з момантам 3 Нм.

12. Вяртаем на месца ветраахову, закручваем ніты з момантам 2 Нм.

13. Усталёўваем накрыўку паліўнага баку на месца, асаблівую ўвагу зьвярніце каб гэты зачэп зачапіўся за адпаведны плястык побач, бо інакш накрыўка будзе кепска трымацца і дрыгацець.

14. Закручваем усе ніты ў зваротным парадку з момантам 8 Нм.

Брава! Вы - малайчына!

Вы толькі што ашчадзілі каля 150zł (35€), атрымалі каштоўны досьвед, а таксама самастойна праінспектавалі свой уласны матацыкл.