iPhone у якасьці навігатара на матацыкле

Вітаю, шаноўныя чытачы!

Гэты пост - працяг тэмы навігацыі на матацыкле. У папярэднім пасьце я зрабіў агляд розных прылад і падставак, а сёньня хачу падзяліцца ўласным досьведам выкарыстаньня тэлефона ў якасьці навігатара.

Спасылка на агляд прылад і падставак для навігацыі на матацыкле

Я карыстаюся iPhone 14 Pro як навігатарам ужо больш за 3 гады і за гэты час праехаў з ім 35 000 км.

iPhone 14 Pro з мапай OsmAnd у падстаўцы FoxWolf на матацыкле

Каротка: iPhone - вельмі зручны навігатар, але без вібраўстойлівай падстаўкі вібрацыі раней ці пазьней сапсуюць сістэму стабілізацыі камеры.

Чаму iPhone 14 Pro

Па-першае, таму што гэта мой адзіны і асноўны тэлефон, які заўсёды пад рукой :)

Ён воданепранікальны і падтрымлівае бесправадную зарадку. А вось яркасьці экрана, на жаль, не заўсёды хапае ў сонечны дзень.

Падстаўка і мацаваньне

Тэлефон у мяне стаіць у кітайскай падстаўцы FoxWolf на штатным мацаваньні BMW пад навігатар - пра яе я падрабязна пісаў у папярэднім пасьце.

Падстаўка FoxWolf на штатным мацаваньні навігатара над прыборнай панэльлю BMW

Чахол у мяне самы звычайны сіліконавы - бесправадная зарадка нармальна зараджае тэлефон нават у чахле. Да таго ж збоку ў падстаўкі ёсьць USB-парты, таму тэлефон заўсёды можна падлучыць і зараджаць провадам.

Тэлефон здымаецца і ставіцца адной рукой, што вельмі зручна.

Мінусам выкарыстаньня iPhone у такой падстаўцы з’яўляецца выпіраючы блок аб’ектываў. Але ў маім выпадку гэта не вельмі перашкаджала - ёсьць пазіцыя, у якой тэлефон нармальна стаіць і працуе.

У мяне было некалькі падзеньняў на матацыкле - на невялікіх хуткасьцях на асфальце падчас мотаджымханы і ў афроўдзе. Кожны раз тэлефон заставаўся ў падстаўцы.

АЛЕ лічу, што на гэта трэба зьвярнуць увагу: мінусам выкарыстаньня свайго адзінага тэлефона можа быць сытуацыя, калі у выпадку ДТЗ тэлефон пашкодзіцца і ў вас проста ня будзе магчымасьці выклікаць хуткую ці іншую дапамогу. Гэта насамрэч вельмі істотна.

Выкарыстаньне ў розных варунках: ад -7 да +36 градусаў

Звычайна я не закрываю мотасэзон. Адзінае, што мяне стрымлівае ад язды на матацыкле зімой - гэта сьнег і галалёдзіца на дарогах, калі проста робіцца небясьпечна. Я ж не вораг самому сабе.

Таму, натуральна, я карыстаюся тэлефонам у вельмі розных варунках: ад -7 да +36 градусаў, а таксама пад моцнымі залевамі.

З перагрэвам падчас язды ў сьпеку я не сутыкнуўся. Адзінае - тэлефон пачынаў вельмі павольна зараджацца, дакладней нават проста не разраджаўся, а трымаў сталы ўзровень зарадкі.

Сэнсар экрана трошкі вар’яцее, калі на яго трапляюць кроплі дажджу. Але месца падстаўкі даволі добрае, таму гэта здараецца вельмі рэдка - толькі ў моцны скосны дождж.

Карыстаньне сэнсарам у пальчатках залежыць ад саміх пальчатак. У мяне іх два камплекты: на летніх усё працуе выдатна (наколькі гэта ўвогуле магчыма ў пальчатках), а вось з грубымі восеньска-зімовымі ўжо нязручна - лепей і хутчэй выцягнуць руку з пальчаткі і адшукаць тое, што трэба.

З батарэяй на холадзе я асабіста не меў ніякіх праблемаў. Памятаю часы, калі iPhone зімой увогуле нельга было выцягнуць з кішэні - ён адразу выключаўся. Але з 14-м у мяне нічога такога не здаралася. Вядома, я не ездзіў гадзінамі пры адмоўных тэмпературах - гэта былі хутчэй кароткія паездкі ў горадзе ды вакол горада.

Добры GPS

iPhone мае добры GPS і даволі хутка ловіць сігнал, калі выязджаеш з танэлю ці падземнай паркоўкі.

У гарах ці ў лесе таксама ніякіх праблемаў - я не сутыкаўся з нейкімі клопатамі.

А вось праца без мабільнай сувязі і афлайн-мапы - тут усё залежыць ад праграмнага забесьпячэньня, а не ад тэлефона.

Але: вібрацыі і камера

Але ёсьць і адно вялікае “але”.

За больш чым 3 гады і 35 000 км я заўважыў, што тэле-аб’ектыў (той, які адказвае за прыбліжэньне) пачаў дрэнна факусавацца. Гэта сымптомы пашкоджанай сістэмы стабілізацыі.

Я быў сьвядомы рызыкі - пра яе нават папярэджвае Apple - але вырашыў праверыць на ўласнай скуры. На жаль, цяпер магу стоадсоткава сьцьвярджаць: выкарыстаньне тэлефона з камерай без вібраўстойлівай падстаўкі раней ці пазьней прывядзе да пашкоджаньня сістэмы стабілізацыі.

Вось прыклад - два здымкі аднаго і таго ж захаду сонца на тэле-аб’ектыў: на першым камера яшчэ патрапіла сфакусавацца, а на другім ужо не. Цяпер яна часьцей не факусуецца, чым факусуецца.

Рэзкі здымак захаду сонца над кукурузным полем: камера сфакусавалася

Размыты здымак таго ж захаду сонца над кукурузным полем: камера не сфакусавалася

Плюсы і мінусы

• USB-парты збоку падстаўкі: тэлефон заўсёды можна зараджаць провадам
• працуе ў вельмі розных варунках: ад -7 да +36 градусаў і пад залевамі
• добры GPS, які хутка ловіць сігнал пасьля танэлю ці падземнай паркоўкі
• тэлефон заўсёды пад рукой, а не ў кішэні - асабліва зручна летам
• можна карыстацца любымі праграмамі для навігацыі: Waze для асфальту, OsmAnd для бездарожжа, Google Maps
• заўсёды зараджаецца ці ўжо зараджаны
• заўсёды бачыш паведамленьні
• воданепранікальны і падтрымлівае бесправадную зарадку
• яркасьці экрана не заўсёды хапае ў сонечны дзень
• калі гэта ваш адзіны тэлефон і ён пашкодзіцца ў ДТЗ - можа не быць магчымасьці выклікаць хуткую ці іншую дапамогу
• выпіраючы блок аб’ектываў замінае ў падстаўцы, але можна знайсьці пазіцыю, у якой тэлефон нармальна стаіць
• без вібраўстойлівай падстаўкі раней ці пазьней пашкоджваецца сістэма стабілізацыі камеры: у мяне праз больш чым 3 гады і 35 000 км тэле-аб’ектыў пачаў дрэнна факусавацца

Падсумаваньне

Тэлефон у якасьці навігатара - гэта вельмі зручна, але калі ваш тэлефон мае добрую камеру - не эканомце на вібраўстойлівай падстаўцы.

Пасьля таго як я выявіў, што ў мяне сапсавалася адна з камер, я часова перастаў выкарыстоўваць iPhone на матацыкле. Трэба застанавіцца, што рабіць далей: інвеставаць у вібраўстойлівую падстаўку, рамантаваць камеру ці проста ездзіць так, як ёсьць? На гэтае пытаньне ёсьць час падумаць, бо сэзон далёкіх паездак сканчаецца - набліжаецца зіма.

А пакуль я здзьмухнуў пыл са старога тэлефона і выкарыстоўваю яго ў якасьці навігатара.

Дзякуй за ўвагу!