Замена алею ў рухавіку BMW R1250GS
чэрвень 15, 2026Вітаю, шаноўныя чытачы!
Працягваю серыю пастоў пра сэрвіснае абслугоўваньне BMW R1250GS сваімі рукамі.
Калі ваш матацыкл пачынае настойліва паказваць вам папярэджаньні пра неабходнасьць замены алею і вы гатовыя самастойна вырашыць гэтую праблему, то гэты артыкул для вас!
Алей у рухавіку мяняецца ў R1250GS раз у год ці кожныя 10 тысяч кіламетраў, у залежнасьці ад таго, што наступіць раней.
Алей у К51 выкарыстоўвацца адначасова для змазкі як рухавіка, так і каробкі перадачаў, таму яго стан вельмі важны для здароўя матацыкла.
Лічнік сэрвіснага інтэрвалу НЕ АДАПТЫЎНЫ, то бок ён лічыць кіламетры 1 да 1 аднолькава калі вы езьдзіце па горадзе, ці па аўтабане, ці ў афроўдзе.
На маю думку гэта падман ці хутчэй такая элегантная змова: замена алею на сэрвісе каштуе дорага, кожны хоча рабіць яе як мага радзей, вось і знайшоўся нейкі такі сярэдні інтэрвал, пры якім матацыкл павінен ад'ездзіць гарантыю, але і ўсе іншыя бакі засталіся задаволеныя - уладальнікі матацыклаў, эколягі, маркетолягі, дылеры і канешне BMW.
Таму раю самастойна адэкватна ацэньваць свае ўмовы эксплуатацыі і мяняць алей раней, калі вы шмат езьдзіце па горадзе ці ў афроўдзе(калі вы канешне не плянуеце неўзабаве прадаваць ваш матацыкл).
Дарэчы якасьць алею можна ацаніць па колеру праз вочка кантролю ўзроўню алею: чым сьвятлей тым лепей, чорнае - час думаць пра замену.
Што спатрэбіцца
-
Звычайны набор інструментаў для абслугоўваньня матацыкла: дынамаметрычны ключ 10-60 Нм, набор розных насадак, набор torx.
-
Арыгінальны алей для рухавіка BMW Advantec Ultimate SAE 5W-40 4 літры (236zł ці 55€)
Наколькі я ведаю алей BMW Advantec прадукуе Shell і можна было б ашчадзіць трошкі грошай на запаветных трох літарах, купляючы яго пад арыгінальным брэндам Shell, але я вырашыў пакуль што не рызыкаваць і купіў арыгінальны.
- Алейны фільтар 11 42 5 B70 298 (81zł ці 18€)
Як мы бачым гэта алейны фільтр MAHLE, думаю што без трох літар таксама было б танней.
- Ключ для адкручваньня алейнага фільтра 76мм Mahle OCS 1(нумар 6073068)
- Ушчыльняльная пракладка пад зьліўны корак: A20x24-AL (4zł ці 1€)
-
Motoscan + UCSI-2100
-
Ёмістасьць для зліву старога алею
-
Папяровыя ручнікі для ачысткі, раю таксама мець прамысловы ачышчальнік-спрэй, напрыклад Wurth, каб лёгка ачысьціць месца ўстаноўкі алейнага фільтра ад старога алею
-
Фіксатар разьбы, калі ў вас Адвэнчэр
Падрыхтоўчыя працы калі ў вас Адвэнчэр(ці проста ёсьць ахоўныя дугі)
Калі ў вас Адвэнчэр, раю зьняць ніжнюю частку ахоўных дуг, бо яна будзе моцна перашкаджаць мяняць алейны фільтар.
Магчыма канешне абыйсьціся і без гэтага, але мне было б вельмі нязручна.
Адкручваем балты зазначаныя на фота стрэлкамі:
Увага! На ніжняй частцы ахоўнай дугі прымацаваны дрот супрацьтуманкі, яго трэба акуратна адлучыць перад тым як здымаць ніжнюю частку.
Да гэтага балта цяжэй усяго дабрацца, я скарыстаўся вось такой канструкцыяй з дзьвух падаўжальнікаў
Вось цяпер ёсьць дастатковы доступ да алейнага фільтра і можна пачынаць працэс замены алею.
Зліваем стары алей з рухавіка
Працэс замены алею ў рухавіку BMW R1250GS даволі просты, але патрабуе пэўнай акуратнасьці і ўвагі.
Замена алею ажыццяўляецца на прагрэтым рухавіку: лепш за ўсё рабіць пасля нейкай паездкі, але можна завесьці і пачакаць першага вентылятара, каб рухавік дасягнуў рабочай тэмпературы.
Прагрэты алей робіцца больш вадкім, што дазволіць зліць яго хутчэй і як мага больш.
Здымаем ахову рухавіка, калі яна ў вас ёсьць.
Зліўны корак знаходзіцца тутака:
Акуратна адкручваем зліўны корак і зліваем адпрацаваны алей у падрыхтаваную ёмістасьць.
Увага! Ён гарачы і вельмі вадкі, я папярэдзіў.
Пакідаем злівацца алей з рухавіка і пераключаемся да замены алейнага фільтра.
Замена алейнага фільтра
Перад тым як адкручваць алейны фільтр, маленькі лайфхак, які я падглядзеў на прасторах інтэрнэту: каб не наляпаць алей на глушыцель(які потым трэба мыць, але рэшткі ўсё роўна будуць дыміць пры першым запуску) можна абгарнуць яго плёнкай ці што ў вас маецца пад рукой.
Ужываючы ключ для алейнага фільтра, акуратна адкручваем яго.
Увага! З-пад фільтра сальецца трошкі алею, але агулам тут не павінна быць аніякіх праблемаў.
Зьвярніце ўвагу каб ушчыльняльны пярсцёнак з старога фільтра не застаўся на месцы ўстаноўкі.
Пасьля даклдана вычышчваем месца ўстаноўкі алейнага фільтра ад старога алею, выкарыстоўваючы папяровыя ручнікі і прамысловы ачышчальнік-спрэй.
Наносім тонкі слой новага алею на ўшчыльняльны пярсцёнак новага фільтра.
Гэта не я прыдумаў, калі што - так трэба рабіць паводле сэрвіснай дакументацыі BMW, бо момант закручваньня алейнага фільтра дадзены з улікам таго, што ўшчыльняльны пярсцёнак будзе змазаны.
Закручваем алейны фільтр з момантам 11 Нм.
Прыкручваем ахоўную дугу, калі ў вас Адвэнчэр
Пасля таго як алейны фільтр закручаны, можна вярнуць на месца ахоўную дугу, калі яна ў вас ёсць.
Чарговасьць і моманты закручваньня на здымку ніжэй:
4ы ніт закручваецца разам з фіксатарам разьбы сярэдняй моцнасьці.
Заліваем новы алей у рухавік
Перад заліўкай новага алею, закручваем зліўны корак з новай алюмініевай пракладкай і момантам 42 Нм.
Не эканомьце на пракладцы - яна аднаразовая: яе кошт мізэрны, і калі яна будзе выкарыстоўвацца паўторна і будзе працякаць вы больш страціце на мыйцы.
Нават калі вы ўжо гэта зрабілі - праверце яшчэ раз, бо ў мяне калісьці здарылася так, што я забыўся пра яго і 4 літры алею элеганта выліліся на падлогу.
Вяртаем на месца ахову рухавіка, калі яна ў вас ёсьць. Момант зацяжкі 11 Нм.
Заліўная гарлавіна знаходзіцца ў клапаннай покрыўцы правага цыліндра. Каб яе адкруціць, нам патрэбная арыгінальная шрубоўка, ручка якой і з'яўляецца ключом.
Поўная ёмістасьць алею ў рухавіку складае каля 4 літраў (разам з фільтарам). Фільтар зараз пусты, таму заліваем смела 3.5 літры алею і правяраем узровень праз вочка кантролю ўзроўню алею, якое знаходзіцца на правым баку ўнізе рухавіка.
Раю ўзбоўтаць каністру з алеем перад заліўкай, каб алей і прысадкі лепш перамяшаліся.
Мне асабіста лейка была непатрэбная - было зручна заліваць алей непасрэдна з каністры.
Правяраем узровень праз вочка кантролю ўзроўню алею, якое знаходзіцца на правым баку ўнізе рухавіка: верх круга - гэта максімум, ніз - мінімум
Заводзім рухавік, праграваем да першага вентылятара, чакаем 5 хвілін і правяраем узровень зноў. Асьцярожна дадаем алей да ўзроўня максімум: тут вельмі важна не перабольшыць, бо тады адзіным выхадам будзе зліваць лішак. Раю зрабіць невялікую паездку і яшчэ раз пераправерыць узровень.
Пасьля невялічкай паездкі алей напэўна зьменіць колер з празрыстага на больш цёмны: ён змяшаўся з рэшткамі старога алею, што засталіся ў рухавіку.
На жаль нават калі пакінуць алей злівацца на доўгі час, усё роўна не атрымаецца зліць яго цалкам, напрыклад з галовак цыліндраў.
Скід сэрвіснага інтэрвалу з дапамогай Motoscan
Тут усё проста: падключаемся да матацыкла, выбіраем Instrument Cluster(KOMBI), далей Service Reset і паслядоўна клікаем спачатку на рэсет інтэрвалу потым даты.
Відэа з працэсам скіду сэрвіснага інтэрвалу можна паглядзець ніжэй:
Як скінуць сэрвісны інтэрвал з дапамогай Motoscan
Вось і ўсё!
Вынік
Вы - малайчына! Вы толькі што ашчадзілі каля 150zł (35€).
З цікавостак, нават пры такім самастойным скідзе, аплікацыя BMW Motorrad(калі вам гэта важна) таксама падхопіць новы сэрвісны інтэрвал ня горш чым гэта было б зроблена ў афіцыялаў.
Аднак канешне ў рэестры BMW гэтай замены ня будзе, улічвайце гэта калі вы плянуеце прадаваць ваш матацыкл у бліжэйшай будучыні, бо гэта можа выклікаць пытаньні ў патэнцыйных пакупнікоў.
Дзякуй за ўвагу.