Навігацыя на матацыкле BMW
30 верасня 2026Вітаю, шаноўныя чытачы!
Сёньня пагаворым пра такую важную прыладу на матацыкле як навігатар, без якой ужо цяжка ўявіць сабе якое-небудзь падарожжа.
Агулам існуе некалькі тыпаў прылад для навігацыі на матацыкле:
- убудаваная навігацыйная сістэма: у выпадку BMW гэта BMW Motorrad Connected
- асобны навігатар: можа быць агульнага прызначэньня (напрыклад TomTom) ці спецыялізаваны тыпу BMW Motorrad Navigator толькі для матацыклаў BMW
- тэлефон ці планшэт, які непасрэдна выкарыстоўваецца ў якасьці навігатара
- вельмі папулярныя апошнім часам прылады з CarPlay/Android Auto, на экран якіх робіцца праекцыя вашага ўласнага тэлефона
Убудаваныя навігацыйныя сістэмы: BMW Motorrad Connected
Ва ўсіх матацыклах BMW з TFT-экранам па змаўчанні ўсталяваная навігацыйная сістэма BMW Motorrad Connected. Яна грунтуецца на выкарыстаньні GPS вашага тэлефону, на якім патрэбна заінсталяваць адпаведную праграму (падтрымліваецца як iOS, так і Android).Праграма на тэлефоне дазваляе спампаваць афлайнавыя мапы (толькі асфальтавыя дарогі) ўсіх краін сьвету, плянаваць і запісваць трасы, абслугоўвае файлы GPX і шмат усяго яшчэ.
BMW Motorrad Connected на тэлефоне
Навігацыя на TFT-экране матацыкла адлюстроўваецца без мапы: стрэлка павароту, адлегласьць да яго і назва вуліцы, але ёсьць магчымасьць уключыць галасавыя паведамленьні, калі ў вас падлучаны інтэрком:
Кіруецца гэтая навігацыя цалкам з руля пры дапамозе WonderWheel, што вельмі зручна і бяспечна.
З дадатковых бонусаў: падчас язды можна дадаваць розныя POI у якасьці наступнага прыпынку, напрыклад кафэ, заправку ці гатэль. Гэта вельмі зручна, бо не трэба спыняцца і шукаць у тэлефоне - праверана на сабе!
Але чаго нельга зрабіць з гэтай навігацыяй, дык гэта ўвесьці нейкі адрас з руля - толькі праз тэлефон.
Плюсы і мінусы:
- дармовая навігацыя з афлайн мапамі ўсіх краін сьвету
- натыўная падтрымка ў матацыкле і агулам вельмі добрая інтэграцыя
- магчымасьць кіраваць навігацыяй з руля праз WonderWheel
- магчымасьць дадаваць POI падчас руху
- інфармацыя пра заторы ў рэальным часе
- падтрымка GPX
- базуецца на GPS з тэлефону, таму патрэбны заўсёды падлучаны тэлефон, які канешне разраджаецца
- без мапы - толькі стрэлкі і адлегласьці: патрабуе прызвычаеньня, нязручна карыстацца ў незнаёмай мясцовасьці, асабліва ў вялікіх гарадах і на складаных раз’ездах
- не паказвае камеры хуткасьці
- няма папярэджваньняў пра паліцыю ці небясьпекі на дарозе
- абслугоўвае толькі вядомыя дарогі - для афроўду не падыходзіць
Агулам, я карыстаюся ёй час ад часу, але галоўным чынам як дадатковай навігацыяй.
Асобныя навігатары
Сур’ёзныя мотападарожнікі звычайна выбіраюць гэты варыянт, як больш надзейны і прафесіянальны. У прыладах такога тыпу ўсталяваны якасны GPS модуль - гэта мае істотнае значэньне, калі вы едзеце ў горы, пустыню ці ў нейкае бязлюддзе, дзе няма сігналу мабільнай сувязі.Такія навігатары звычайна ўмеюць працаваць у рэжыме афлайн альбо анлайн, калі вы ім дасіце інтэрнэт з свайго тэлефона, але ў такім разе тэлефон мусіць быць падлучаны да зарадкі, бо ён будзе хутка разраджацца.
Галоўная праблема, на маю думку, гэта кошт такой прылады - ён часьцей за ўсё даволі вялікі. Яшчэ адным мінусам для мяне з’яўляецца прывязка да нейкага спецыфічнага для канкрэтнага навігатара праграмнага забяспечаньня.
Асобныя навігатары: BMW Motorrad ConnectedRide Navigator
BMW Motorrad ConnectedRide Navigator над TFT-экранам матацыкла BMW
BMW Motorrad ConnectedRide Navigator прыйшоў на зьмену Navigator VI, які BMW рабіла разам з Garmin. Новы навігатар BMW распрацавала сама, а мапы для яго робіць TomTom.
ConnectedRide Navigator безумоўна добра зінтэграваны з матацыкламі BMW: ім зручна карыстацца наўпрост з руля з дапамогай WonderWheel.
BMW да сваіх матацыклаў дадае падстаўку пад уласны навігатар BMW Motorrad Navigator - гэта такі спрытны маркетынгавы ход, каб лагодна прывязаць да сваёй прадукцыі.
Штатная падстаўка BMW пад навігатар BMW Motorrad Navigator з раздымам і кабелем
Яна вельмі зручная, надзейная і дазваляе хутка здымаць навігатар падчас стаянак у падарожжы. Да таго ж яна абараняе навігатар ад крадзяжу - без ключыка не атрымаецца выняць навігатар з падстаўкі.
Дзе ж падвох? А вось і ён - кошт такога навігатара гэта 600-800€ (так!). Працуе ён толькі з праграмай BMW Motorrad Connected, якая скажам так мае свае плюсы і мінусы і не з’яўляецца маёй улюбёнай.
Да таго ж ён арыентаваны галоўным чынам на асфальтавыя падарожжы, таму ён не з’яўляецца добрым выбарам для аматараў афроўда.
Я спачатку разглядаў варыянт “купіць для матацыкла BMW усё ад BMW”, але пабачыўшы кошт і пачытаўшы водгукі хутка адмовіўся ад гэтай ідэі.
Плюсы і мінусы:
- добрая інтэграцыя з матацыкламі BMW
- афлайн мапы ўсіх краін
- бясплатныя абнаўленьні мапаў і праграмнага забесьпячэньня
- магчымасьць кіраваць навігацыяй з руля праз WonderWheel
- інфармацыя пра заторы ў рэальным часе
- слот для SIM-карты: заторы і іншыя анлайн-сэрвісы працуюць і без тэлефона
- вельмі высокі кошт
- працуе толькі з праграмай BMW Motorrad Connected
- не паказвае камеры хуткасьці (у адрозненьне ад Navigator VI)
- не падыходзіць для афроўду
Асобныя навігатары: TomTom
TomTom Rider 550
Я асабіста ніколі не меў навігатара маркі TomTom, але маю знаёмых матацыклістаў, якія карыстаюцца і вельмі задаволеныя.
З галоўных асаблівасьцяў: няма ніякіх часовых ліцэнзій - купляеш дэвайс і пажыццёва карыстаешся ўсімі функцыямі, у тым ліку і афлайн мапамі.
Прыладай можна карыстацца як на матацыкле (з адпаведнай падстаўкай), так і ў аўтамабіле. Прылада мае ўласны акумулятар, якога хапае на некалькі гадзін працы.
Ёсьць некаторыя фішкі, якіх няма ў іншых навігатараў, тыпу: замярае фактычную сярэднюю хуткасьць на адрэзках з фатарадарамі і г.д.
Калі б я шукаў сабе такога тыпу навігатар, то хутчэй за ўсё пайшоў бы ў бок TomTom.
Плюсы і мінусы:
- асобная прылада з уласнай батарэяй і падстаўкай
- афлайн мапы ўсіх краін
- пажыццёвая ліцэнзія на ўсе функцыі
- інфармацыя пра заторы і папярэджаньні пра камеры хуткасьці (праз тэлефон)
- можна карыстацца на любым транспартным сродку: матацыкле ці аўтамабілі
- брак інтэграцыі з матацыкламі BMW
- не падыходзіць для афроўду
- не мае ўласнай карты SIM, трэба падлучаць тэлефон для анлайн-сэрвісаў (напрыклад, інфармацыі пра заторы)
Тэлефон у якасьці навігатара
Я асабіста карыстаюся тэлефонам у якасьці навігатара, бо ён заўсёды пад рукой. Да таго ж я не абмежаваны выбарам праграм: для асфальту я карыстаюся галоўным чынам Waze, для бездарожжа - OsmAnd, але калі трэба можна лёгка пераключыцца на Google Maps напрыклад.Спасылка на мой досьвед выкарыстаньня iPhone 14 Pro у якасьці навігатара
Каб карыстацца тэлефонам як навігатарам трэба мець падстаўку, якая будзе надзейна яго трымаць. Акрамя надзейнага мацаваньня, падстаўка павінна дазваляць хутка здымаць тэлефон і мець магчымасьць яго зараджаць падчас руху.
Калі ваш тэлефон мае добрую фотакамеру з аптычнай стабілізацыяй (як большасьць сучасных тэлефонаў) - варта карыстацца вібраўстойлівымі падстаўкамі, бо інакш ёсьць высокае рызыка сапсаваць яе. Пра гэта нават папярэджвае Apple.
Ёсьць цэлы шэраг папулярных падставак і мацаваньняў для матацыклаў, але я спынюся толькі на тых, якія я разглядаў ці меў дачыненьне.
Плюсы і мінусы:
- заўсёды пад рукой - ён хутчэй за ўсё ў вас ЎЖО ЁСЬЦЬ
- можна карыстацца рознымі праграмамі для навігацыі
- можна лёгка пераключацца паміж праграмамі
- Waze і Google Maps паказваюць заторы і камеры хуткасьці, а Waze яшчэ і паліцыю ды небясьпекі на дарозе
- мусіць быць воданепранікальны, калі вы плянуеце ездзіць у кожных пагодных варунках
- патрабуе надзейнай падстаўкі і мацаваньня
- патрабуе зарадкі
- вібрацыі могуць сапсаваць камеру з аптычнай стабілізацыяй - патрэбная даволі каштоўная вібраўстойлівая падстаўка
- можа мець горшы GPS модуль чым у асобных навігатараў, што можа быць крытычна ў горных раёнах ці ў пустыні
- можа мець горшую яркасьць экрану, што можа быць крытычна ў сонечныя дні
Тэлефон у якасьці навігатара: BMW Motorrad ConnectedRide Cradle
Зноў BMW ужо падумала і зрабіла ўсё для вас, мае дарагія (у кожным сэнсе) карыстальнікі матацыклаў BMW: сустракайце - падстаўка BMW Motorrad ConnectedRide Cradle (нэймінг у іх канешне), якая ідэальна падыходзіць да падстаўкі пад навігатар BMW Motorrad Navigator!
Падстаўка BMW Motorrad ConnectedRide Cradle
BMW Motorrad ConnectedRide Cradle з замком OPEN і USB-партом
Выглядае боска! Калі яна толькі з’явілася, памятаю які быў хайп і попыт на яе.
Што робіць яе такой унікальнай? Яна мае ўбудаваны Connectivity Hub, падлучыўшыся да якога вы можаце карыстацца навігацыяй BMW Motorrad Connected з руля з дапамогай WonderWheel. Напэўна зручная рэч для тых, хто карыстаецца гэтай навігацыяй.
Плюсы і мінусы:
- можна карыстацца навігацыяй BMW Motorrad Connected з руля з дапамогай WonderWheel
- можна зараджаць тэлефон падчас руху
- сумяшчальная з падстаўкай пад навігатар BMW Motorrad Navigator
- абсурдна вялікі кошт ~230€
- слабая бесправадная зарадка: зарадзіць ёй iPhone у чахле - без шанцаў
- слабая правадная зарадка: толькі адзін USB-порт і брак падтрымкі хуткіх стандартаў
- няма аховы ад вібрацыі
- слабы плястык ніжняга мацаваньня: з часам ён шмат у каго проста ламаецца (але можна купіць рэмкамплект!)
BMW Motorrad ConnectedRide Cradle на матацыкле BMW
Тэлефон у якасьці навігатара: кітайская ноў-нэйм падстаўка для BMW
Канешне кітайцы таксама паклапаціліся пра менш багатых карыстальнікаў матацыклаў BMW і зрабілі падстаўку, якая адна ў адну падыходзіць да штатнай падстаўкі BMW пад навігатар і вельмі нагадвае па функцыянале арыгінальны крэдл.Сустракаецца часьцей за ўсё пад назвай FoxWolf, але назва тутака не мае вялікай ролі.
Карыстаюся такой падстаўкай апошнія 4 гады і на маю думку гэта лепшы танны варыянт для мацаваньня тэлефона на матацыкле BMW.
Кошт такой падстаўкі - 15-20€ у залежнасьці ад крамы і дастаўкі. Яна мае два ўбудаваных USB-парты і бесправадную зарадку на невядома колькі ватаў, але мой iPhone 14 Pro нават у чахле ў стане зараджацца ад яе.
Плюсы і мінусы:
- бесканкурэнцыйна нізкая цана
- добрая бесправадная і звычайная правадная зарадка
- сумяшчальная з падстаўкай пад навігатар BMW Motorrad
- няма ніякай аховы ад вібрацыі
- слабы плястык ніжняга мацаваньня
Вяртаючыся да мінусаў, асобна дадам: аднойчы ў мяне здарылася, што ніжняе мацаваньне проста адпала ўніз падчас выцягваньня тэлефону. Апынулася, што плястык ўнутры механізму вельмі хліпкі і проста зламаліся “вушкі” роліка. Атрымалася гэта адрамантаваць уласнымі сіламі, але калі б гэта здарылася ў падарожжы было б вельмі непрыемна.
Прылады з CarPlay/Android Auto
У апошнія гады з’явіўся новы тып прылад - планшэт з магчымасьцю падлучэньня і праекцыі экрану свайго тэлефона праз CarPlay/Android Auto.Ідэя агулам супер: тэлефон схаваны ў кішэні, а праекцыя на планшэце, камера тэлефона не пакутуе ад вібрацый - камфорт! Прылады часьцей за ўсё зінтэграваныя з падстаўкай BMW, таму можна хутка іх мантаваць і здымаць.
Самыя папулярныя - Chigee (напрыклад AIO-6) і Carpuride (напрыклад W602S Pro).
Агульныя плюсы і мінусы:
- можна карыстацца рознымі праграмамі для навігацыі
- можна лёгка пераключацца паміж праграмамі
- інфармацыя пра заторы і камеры хуткасьці з Waze ці Google Maps
- можна зараджаць тэлефон падчас руху
- камера тэлефону не пакутуе ад вібрацый
- кошт такіх прылад ад 400€ і больш
- не маюць уласнага акумулятара - працуюць толькі ад матацыкла
- неабходнасьць усё адно падлучаць тэлефон да нейкай зарадкі падчас падарожжаў, бо CarPlay выцягне ўсю батарэйку за 5-6 гадзін
- карыстаньне праекцыяй некаторых праграм менш зручнае чым карыстаньне праграмай на тэлефоне (напрыклад OsmAnd)
- хоць гэтыя планшэты і зробленыя на базе Android, карыстацца імі як паўнавартаснымі Android планшэтамі не атрымаецца
Я прыглядаўся да іх абодзьвух і прыйшоў да высновы, што мне больш падышоў бы Chigee, але кошт апошняй версіі разам з камерамі гэта амаль што 1000€, а гэта ўжо занадта шмат для мяне.
Падсумаваньне
У пытаньні навігацыі няма срэбрнай кулі - кожны з нас мае розныя патрэбы і розныя прызвычаеньні, розныя погляды на кошты і тэхналёгіі. Я асабіста працягваю карыстацца тэлефонам у якасьці навігатара і гэта мяне цалкам задавальняе, але хто ведае ці не зменіцца гэта ў будучыні.Спадзяюся гэты агляд быў вам карысны.
Дзякуй за ўвагу!








