Замена алею ў рэдуктары BMW R1250GS

Вітаю, шаноўныя чытачы!

Наступны пост з серыі пра сэрвіснае абслугоўваньне BMW R1250GS сваімі рукамі.

Згодна з інструкцыяй, раз на два гады ці кожныя 20 тысяч кіламетраў трэба мяняць алей у рэдуктары.

У мяне ён мяняўся менш за год таму і праехаў каля 9к км, але я ўсё адно вырашыў яго замяніць разам з заменай алею ў рухавіку, так сказаць прафілактычна.

Што спатрэбіцца

• Звычайны набор інструментаў для абслугоўваньня матацыкла: дынамаметрычны ключ 10-60 Нм, набор розных насадак, набор torx.

• Арыгінальны алей для гіпоідных перадач BMW Motorrad Hypoid Axle Oil G3 180мл (139zł ці 30€ за 500мл).

Мінімальная ёмістасьць бутэлькі даступнай у продажы гэта 500мл.

Тут ёсьць пэўны лайфхак: можна купіць у складчыну з сябрам і выкарыстаць разам.

Другая опцыя гэта зрабіць замену алею штогадовай, бо алей старэе і губляе свае ўласцівасьці нават калі ён у каністры. Вы не страціце шмат грошай, а рэдуктар скажа толькі дзякуй.

Алей для гіпоідных перадач BMW Motorrad Hypoid Axle Oil G3

• Ушчыльняльная пракладка пад зліўны корак 07 11 9963132: A12x16-CU (6zł ці 1.5€)

• Ушчыльняльны пярсцёнак (o-ring) пад заліўны корак 07 11 9904693: 11,2x1,8 (4zł ці 1€)

Ушчыльняльная пракладка і пярсцёнак злева на права

• Вялікі медыцынскі шпрыц(я выкарыстоўваў 100мл, кошт 4zł ці 1€)

• Ёмістасьць для зліву старога алею

Падрыхтоўчыя працы

У якасьці падрыхтоўчых прац трэба зняць пырскавік (3 ніты torx), каб атрымаць зручны доступ да заліўнога корку.

Таксама раю зняць задняе кола (5 нітаў) - гэта не зойме шмат часу, але дазволіць зручна зліць стары алей не запляміўшы кола.

Зліваем стары алей з рэдуктара

Зліўны корак знаходзіцца знізу рэдуктара, адкручваем і зліваем стары алей у падрыхтаваную загадзя ёмістасьць.

Зліваем стары алей з рэдуктара

У маім выпадку алей быў даволі чысты.

Зліваем стары алей з рэдуктара

Корак мае магніт на доле, які прыцягвае дробныя часціны металу, якія могуць з’явіцца ў алеі падчас працы рэдуктара.

Аглядаем і чысьцім яго.

Корак мае магніт на доле

Мяняем ушчыльняльны пярсцёнак на зліўным корку на новы. Паводле сэрвіснай інструкцыі яго можна выкарыстоўваць некалькі разоў, але я вырашыў не рызыкаваць і паставіць новы, тым больш што кошт зусім нязначны.

Мяняем ушчыльняльны пярсцёнак на зліўным корку на новы

Закручваем корак дынамаметрычным ключом з момантам 20Нм.

Заліваем новы алей у рэдуктар

Адкручваем заліўны корак.

Заліўны корак

Шчыра кажучы, я ледзь адкруціў яго: ён мусіць быць закручаны з момантам 25 Нм, але ён быў заціснуты відавочна большым момантам.

Зьвяріце ўвагу на амаль пазрываныя шліцы. Вось чаму я ўсё менш давяраю сэрвісам(нагадаю - матацыкл абслугоўваўся выключна ў афіцыялаў).

Акуратна чысьцім бруд вакол гарлавіны, каб нічога не трапіла ўнутр.

Заліўная гарлавіна

Заліўны корак разам з ушчыльняльнай меднай пракладкай

Мяняем медную пракладку на заліўным корку на новую. Тут не ашчаджаем.

Далей нам трэба адмерыць дакладна 180мл алею і заліць яго ў рэдуктар. Я выкарыстоўваў звычайны медыцынскі шпрыц на 100мл з звычайнай аптэкі.

Звычайны медыцынскі шпрыц на 100 мл

Заліваем алей у рэдуктар

Закручваем заліўны корак дынамаметрычным ключом з момантам 25Нм.

Далей вяртаем на месца задняе кола (60 Нм) ды пырскавік (3 Нм, ужываем фіксатар разьбы сярэдняй моцнасьці).

Вось і ўсё!

Вы - малайчына! Вы толькі што ашчадзілі каля 210zł (50€) і вы дакладна ведаеце, што і колькі ў вас заліта ў рэдуктар.