Cэрвіснае абслугоўваньне матацыкла BMW у Чэхіі

Вітаю, шаноўныя чытачы!

На пачатку гэтага года ў польскім інтэрнэце людзі дзяліліся інфармацыяй, што у польскіх салонах неапраўдана высокія цэны як на самыя матацыклы, так і на сэрвіснае абслугоўваньне. Я не прыдаў шмат увагі гэтай інфармацыі, але запамятаў.

Надышоў час, калі мне трэба было зрабіць чарговы сэрвіс матацыкла BMW R1250GSA. Увесь гарантыйны перыяд я абслугоўваўся ў адным з афіцыяльных салонаў БМВ ва Ўроцлаве, дзе я набыў гэты матацыкл. Апошнія разы я быў вельмі незадаволены падыходам абслугоўваньнем, галоўным чынам фатальнай камунікацыяй.

І вось я успомніў чуткі пра цэны ў суседзяў і вырашыў, што гэта добры момант праверыць самастойна.

Пошук сэрвіснага цэнтра

Я пачаў шукаць афіцыйныя сэрвісныя цэнтры BMW у суседніх з маім рэгіёнам краінах - Чэхіі ды Германіі. Найбліжэйшы аказаўся салон BMW CarTec ў Чэхіі, у горадзе Астрава - каля 200 кіламетраў ад мяне. Усё іншае было за далёка і не мела сэнсу туды ехаць.

Я напісаў ім на электронную пошту ліст, каб даведацца пра кошты на сэрвіснае абслугоўваньне і тэрміны. Спадабадася, што яны адказвалі даволі хутка і на добрай ангельскай мове. Найбліжэйшыя вольныя тэрміны былі праз 3 тыдні, але цана выглядала вельмі прывабна.

Адначасова я напісаў у адзін з салонаў BMW ва Ўроцлаве, каб параўнаць: кошты аказаліся вышэйшыя, але з вольнымі тэрмінамі няма праблемаў.

Паразважаўшы, выбраў салон у Чэхіі. Гэта будзе цікавы эксперымент.

Паездка ў чэскую Астраву

Я атрымаў тэрмін а 7:30 раніцы, таму каб прыехаць своечасова, мне трэба было выязджаць з дому а 4-й гадзіне.

Даўно не выязджаў так рана, таму гэтае пачуцьцё пустога горада, які толькі прачынаецца, амаль пустой аўтастрады і ранішняга прахладнага вільготнага паветра было даволі прыемным. Навокал у нізінах стаіць ранішні туман. Сонейка толькі-толькі пачынае падымацца над гарызонтам.

Нягледзячы на тое што зараз палова жніўня, ночы ужо даволі халодныя: пакуль не вышла сонейка, было ўсяго +10-12 градусаў. Я хоць і добра апрануся як на восень, але ўсё адно замерз і пашкадаваў, што не ўзяў тэрмабялізну.

Дарэчы, апошнім часам я вельмі расчараваны гугл-мапамі: яны часта паказваюць нейкія дзіўныя маршруты, якія нібыта на хвіліну хутчэйшыя, але на самой справе вядуць праз нейкія дзіўныя дарогі ў вельмі сумнеўным стане. Але гэта будзе тэма на асобны пост.

А 6 раніцы ўжо здаецца ніхто ня спіць у польскіх вёсках - такі інтэнсіўны рух паўсюль. У некаторых вузкіх месцах нават з'яўляюцца дробныя заторы.

Нарэшце я даехаў на месца, акурат на час.

Мяне сустрэў мілы супрацоўнік, які ня вельмі упэўнена размаўляў на ангельскай мове, ён запытаў ці разумею я па-чэску і быў вельмі рады пачуць што мы можам спрабаваць дамаўляцца на польска-чэскай. Ён хутка ўсё аформіў, распавёў што будзе рабіцца і колькі зойме гэта часу.

Я ўжо зьбіраўся ісьці ў кафэ на другім паверсе, калі ён запрапанаваў мне ўзяць любы матацыкл з іх салону пакатацца, каб я мне не было сумна чакаць. Прыемна, але падзякаваў, бо ў мяне былі іншыя пляны.

А пляны мае былі папрацаваць пакуль матацыкл абслугоўваецца. Некаторыя людзі, якія чакалі на свае матацыклы побач са мной, выкарыстоўвалі гэты час больш эфектыўна :)

Час праляцеў хутка. Пасля абеду я нарэшце атрымаў інфармацыю што сэрвіс сконьчаны.

Ацэнка сэрвісу

Сума атрымалася трошкі меншая нават чым дамаўляліся, бо мне зрабілі зьніжкі, а нейкую праверку тэхнік увогуле зрабіў задарма. Старыя сьвечы, якія я нядаўна мяняў самастойна, мне аддалі як я і прасіў(а не забылі як палякі падчас апошняга абслугоўваньня).

Я разлічыўся, атрымаў усе паперы і ключы і выйшаў з салона.

Навучаны досьведам, я заўсёды правяраю матацыкл пасля такіх сэрвісаў: здаралася, што зьнікалі шрубоўкі, драпаліся плястыкі, ну і розныя там іншыя рэчы адбываліся. Раю і вам не забываць што ў афіцыйных сэрвісах таксама розныя людзі працуюць.

І вось тут мяне чакала непрыемнае расчараваньне: сьвежая пляма алею проста на зямлі пад матацыклам. Я ня ведаю як трэба было наліваць гэты алей, каб уся бакавая падножка была заляпаная.

Не зрабіў фота, але заўважыў што калі налівалі алей, то наляпалі таксама вакол заліўной адтуліны. Я вельмі абурыўся, бо гэта ж відавочная халтура і нядбальства.

Прыйшлося ісьці да супрацоўніка і паказваць яму ўсё гэта. Ён канешне выбачаўся, прыляцеў з нейкім ручніком і спрэем і пачаў усё па-хуткаму выціраць.

Для мяне гэта чырвоны сьцяг, бо гэта азначае што альбо механік нядбайны і невядома як ён зробіць іншыя больш складаныя рэчы, альбо ён працуе пад ціскам часу, што таксама можа прывесьці да праблемаў. Адным словам, я быў раззлаваны і расчараваны.

Прыехаўшы дадому, я аглядзеў матацыкл яшчэ раз і заўважыў што алей налілі таксама на кола, калі залівалі ў дыферэнцял:

Заліўную адтуліну дыферэнцыялу таксама не вычысцілі ад рэшткаў алею:

Алей наліты пасярэдзіне min-max - тут я канешне ня ведаю які рэгламент, але, калі б гэта рабіў я, то наліў бы на максімум.

Істотны нюанс: ужо дома я заўважыў што чэхі не замянілі пракладкі пад пакрыўкамі клапанаў. Проста пакінулі старыя дый усё.

З аднаго боку - пракладкі стояць шмат грошаў, з другога - старыя пракладкі могуць пачаць прапускаць алей і іх усё адно прыйдзецца замяняць.

Дзіўная практыка. У Польшчы іх заўсёды мяняюць калі толькі здымаюць пакрыўкі.

Кошты сэрвісу

Я падсумаваў усе кошты ў табліцу(лепей глядзець на вялікім экране), каб лягчэй было параўнаць з коштамі ў Польшчы якія я меў ў 2023 годзе і паводле ацэнкі, якую я атрымаў у 2025 годзе. Усе кошты пазначаныя ў польскіх злотых, чэскія кароны пералічаныя па курсе на дзень сэрвісу.

Падсумаваньне

Адчуваньні ў мяне моцна змешаныя: сэрвіс каштаваў мне на каля 850 злотых таней, чым у Польшчы - гэта прыемна, але тут ёсьць пэўныя нюансы.

Відавочна што кошты запчастак такія ж, альбо нават вышэйшыя чым у Польшчы(і гэта пры тым што VAT у Чэхіі ніжэйшы: 21% супраць польскіх 23%). У Чэхіі таннейшая праца, плюс некаторыя "трукі" тыпу пакінуць старыя пракладкі таксама моцна зніжаюць кошт сэрвісу.

Калі б яны замантавалі новыя пракладкі коштам 500+ злотых, то эканомія была б зусім малая.

На плюс зычлівасьць персаналу салона, але яна кампенсуецца нядбальствам механікаў.

Ад Уроцлава ехаць прыкладна 3 гадзіны і 200км у адзін бок, дадаткова трэба ўлічыць каля 25 літраў паліва, а гэта яшчэ каля 150 злотых. Выснавы рабіце самі.

Дзякуй за ўвагу, спадзяюся мой досьвед будзе карысны для вас.