Прастаўкі пад руль: безыменны кітаец vs Touratech

Вітаю!

Сёньня я хачу падзяліцца сваім досьведам выкарыстаньня праставак пад руль для BMW R1250GS.

Перадгісторыя

5 гадоў таму, калі я набыў свой матацыкл, заўважыў што ў мяне хутка стамляецца спіна і рукі на працяглых(>200км) паездках.

Выявілася, што мая пазіцыя на матацыкле была не зусім правільная: я быццам цягнуся да руля, які быў трошкі за нізка і за далёка ад мяне.

GS дазваляе добра рэгуляваць вышыню сядзеньня і нахіл руля, але мне з маёй даўжынёй рук і ўзростам не хапала каб руль быў 2-3 сантыметраў вышэй і бліжэй.

Хуткі пошук паказаў, што існуе шэраг праставак пад руль, якія дазваляюць скарэктаваць пазіцыю. Я вырашыў паспрабаваць.

Ведаючы прыкладна вышыню і адлегласць, я знайшоў адпаведныя фірмовыя прастаўкі. Праблема была толькі ў кошце - яны каштавалі каля 150 еўра :(

Кітайскія прастаўкі

Я вырашыў паглядзець ці няма на AliExpress нейкіх аналагаў, і быў здзіўлены - дакладна такія ж прастаўкі прадаваліся 10 разоў таньней! Разумею, што кітайцы проста скралі канструкцыю, і гэта не зусім добра падтрымліваць такі падыход, бо яны нічога новага не вынаходзяць, у адрозьненьні ад арыгінальнай маркі.

Я не быў да канца ўпэўнены, што гэтыя прастаўкі мне падыдуць, таму вырашыў рызыкнуць: купіць "прататып" на 38мм, паспрабаваць і потым купіць арыгінальныя.

Мантаж кітайскіх праставак

Істотная заўвага: чым большыя прастаўкі, тым большае рызыка што можа не хапіць даўжыні арыгінальных правадоў ды шлангаў. Мне акурат хапіла, але вельмі усутыч. Калі б не хапіла, то падаўжэньне магло б каштаваць шмат грошай. Майце на ўвазе.

Мантаж быў даволі простым. Здымаем арыгінальнае мацаваньне руля, ставім прастаўкі, замацоўваем іх, потым замацоўваем руль на новым месцы.

Паспрабаваў. Камфорт язды значна палепшыўся: спіна і рукі сталі стамляцца значна менш. Паверце вы адразу адчуеце целам, калі вы пасля кепскай пазіцыі перасядзеце на больш правільную.

Праз пару паездак я ўжо і забыўся пра іх і так ездзіў сабе гадамі, пакуль не пачаў летась ездзіць у афроўдзе.

Пасля адной з афроўдных паездак заўважыў што руль пачаў трошкі хістацца: раскруціліся балты на прастаўках. Падцягнуў, але метал настолькі мяккі, што страшна сарваць разьбу. Немагчыма дацягнуць "да канца", бо разьба ўвесь час трошкі "паддаецца".

Пасля адной з найбольш жорсткіх афроўдных паездак у гэтым годзе я прыехаў дадому без аднаго з нітаў увогуле - ён адкруціўся і выпаў. Вельмі небяспечна.

Ужо дома купіў новыя ніты, але падчас зацягваньня ў адной з праставак сарваў разьбу. Паглядзіце самі якая яна "моцная":

Таму, я нарэшце вырашыўся набыць арыгінальныя прастаўкі за шмат грошаў, але з нейкай гарантыяй якасьці.

Фірмовыя прастаўкі ад Touratech

Першапачаткова я хацеў набыць арыгінальныя прастаўкі ад Wunderlich, копіі якіх былі ў мяне і канструкцыя якіх добра сябе паказала. Але потым я знайшоў альтэрнатыву ад Touratech, якая мне паказалася больш прадуманай. Сустракайце!

Арыгінальна запакавана, з інструкцыяй і кіпай паперак з сертыфікатамі якасьці - на ўсе 150 еўра!

Мае першыя ўражаньні - яны значна больш цяжкія чым кітайскія і ўсе элементы выглядаюць больш якасна ці то разьба, ці дзіркі. Я не эксперт у металаапрацоўцы, але мне падалося што яны быццам фрэзераваныя, а кітайскія нібыта проста адлітыя.

Разьба выглядае больш упэўненай і глыбокай чым у кітайскіх:

Мантаж фірмовых праставак ад Touratech

Мантаж такі ж самы просты як для кітайцаў. Можна паглядзець інструкцыю, калі ёсьць сумневы.

Асобны плюс для Touratech за моманты зацягваньня ўсіх балтоў у інструкцыі.

Дадаў шайбы гровера пад усе вонкавыя балты і не выкарыстоўваў фіксатар разьбы на іх.

Чаму? На рулі ёсьць адзнакі рэгуляцыі: для язды па асфальце ці бездарожжы могуць спатрэбіцца розныя пазіцыі руля, таму ня бачу сэнсу фіксаваць іх назаўсёды. Калі яны нават адкруцяцца - іх лёгка можна даціснуць.

І яшчэ некалькі фота што з гэтага атрымалася:

Падсумаваньне

Пасля некалькіх месяцаў выкарыстаньня магу сказаць што я задаволены арыгінальнымі прастаўкамі ад Touratech. Адзін раз, пасля першай тысячы км у змешаным цыкле, даціснуў балты і ўсё.

Цана канешне магла быць больш дэмакратычнай, але якасьць канкурэнтаў не вытрымлівае ніякай крытыкі.

Кітайцы - гэта добры варыянт калі вы хочаце проста паспрабаваць і не ўпэўненыя, што вам патрэбныя прастаўкі: нізкая цана - нізкае рызыка, калі нешта не падыдзе.

Магчыма яны падыдуць тым, хто не з'язджае з асфальту і ездзіць без шалёнасьцяў, але я аднак раю купляць арыгінальны якасны прадукт, асабліва для такіх крытычных месцаў як руль.