Dunlop Trailmax Raid: падсумаваньне сезону

Вітанкі!

Сёньня я хачу падзяліцца досьведам выкарыстання шынаў Dunlop Trailmax Raid на маім BMW R1250GS.

Спасылка на пост аб тым, чаму я выбраў менавіта Dunlop Trailmax Raid

Агляд сезону 2025

У гэтым сезоне я зрабіў на іх каля 8 тысяч кіламетраў па польска-чэска-славацкіх дарогах у вельмі розных варунках:

• аўтастрады(з крэйсерскай хуткасьцю 120-130км/г), часамі з поўным заладаваньнем куфраў ды пасажырам
• звычайныя дарогі
• гарадскі рух
• бездарожжа(грунтоўкі, гравійныя дарогі, палі, лясы, пясок)

Сезон 2025 быў вельмі шчодры на кепскае надвор'е - амаль у кожным падарожжы я трапляў пад большы альбо меншы дождж.

Вясной здаралася катацца асфальтам ў каля нулявыя тэмпературы, але я не адчуў нейкага моцнага пагаршэньня прычэпнасьці.

На асфальце галоўны мінус - гэта шум на аўтастрадных хуткасьцях. Да вібрацыі я хутка прызвычаіўся, а вось з шумам горш. Ён зрабіўся цішэйшы з паступовым зносам, але ў параўнаньні да шасэйных ён усё яшчэ гучны.

На мокрым асфальце не заўважыў недахопу прычэпнасьці. Ня ведаю як дакладна гэта працуе, але на мокрым асфальце шум ад шын робіцца менш гучны.

Чаго гэтыя шыны ня любяць, дык гэта гліністага бруду. Цалкам асьцярожная язда па "балоце" мажлівая, але трэба заўсёды быць чуйным - прычэпнасьці часамі не хапала.

На фатаздымку ніжэй канешне я трапіў у вельмі жорсткія варункі: для такой язды па балотах трэба мець матацыкл па-лягчэй ды больш шыпастыя шыны, без кампрамісаў.

На зыбкім пяску пад варункам нізкага ціску ў шынах я цалкам задаволены з іх мажлівасьцяў.

Вось так выглядаюць у асноўным мае падарожжы па лакальных бездарожжах і гэтыя шыны ідэальна падыходзяць пад камфартовы даезд да месца асфальтам, а потым усё яшчэ камфартовую язду па грунтоўках ды гравійках

Знос

Калі я шукаў інфармацыю на гэтыя шыны, бачыў водгук што зношваюцца яны 2:1, то бок дзьве заднія на адну пярэднюю шыну і я цалкам згодны. Я ніяк спецыяльна не клапаціўся пра знос - проста ездзіў так як мне было патрэбна.

Глыбіня пратэктару	Новая	Пасля 8000км	Розніца
Пярэдняя шына	7.8мм	6.3мм	1.5мм	19.2%
Задняя шына	10.4мм	5.9мм	4.5мм	43.2%

Вось як гэта выглядае на фота: цэнтр моцна знасіўся, што не дзіўна.

На мокрае бездарожжа такая шына ўжо канешне не надаецца, але думаю што па асфальце можна было б яшчэ тысячу-паўтары праехаць.

Пярэдняя шына мяне здзівіла адносна нізкім зносам. Калі прыглядзецца, можна заўважыць што вострыя канты пратэктару зрабіліся больш залізаныя - гэта мінус для бездарожжа, бо яны будуць горш угрызацца ў паверхню. Але цалкам шына выглядае добра - яшчэ паездзіць.

Падсумаваньне

Агулам, я вельмі задаволены гэтымі шынамі - гэта менавіта той кампраміс, якога я шукаў.

Вынікі зносу задавальняючыя, як на такой тып: сезон быў ад'езджаны без клопатаў, час замяніць заднюю і яшчэ павінна хапіць на наступны ці як мінімум на большасьць наступнага сезону.

Заўсёды ёсьць імавернасьць, што на рынку ёсьць нешта лепшае, але пакуль што я хачу застацца з гэтымі шынамі.

Дзякуй за ўвагу!